- By ქეთევან ძაგანია
- In სიახლეები
FDA-მ ლევოკეტოკონაზოლი კუშინგის სინდრომის სამკურნალო საშუალებად დაამტკიცა
სტატია ქართულ ენაზე თარგმნა რეზიდენტმა ენდოკრინოლოგმა: ანა კოტორაშვილი
რედაქტირებულია GAEM-ის სარედაქციო ჯგუფის მიერ: ქეთევან ძაგანია
წყარო: FDA Approves Levoketoconazole for Cushing Syndrome
შეერთებული შტატების საკვებისა და წამლის სააგენტომ (FDA) ლევოკეტოკონაზოლი (Recorvel, Xeris Biopharma) დაამტკიცა ჰიპერკორტიზოლემიის სამკურნალოდ კუშინგის სინდრომის მქონე ზრდასრულ პაციენტებში, რომელთათვისაც შეუძლებელია ოპერაციული გზით მკურნალობა.
ენდოგენური კუშინგის სიმდრომი შედარებით იშვიათი მდგომარეობაა, რომლისთვისაც დამახასიათებელია კორტიზოლის ქრონიკულად მაღალი მაჩვენებელი. როგორც წესი, ის ყალიბდება ჰიპოფიზის კეთილთვისებიანი სიმსივნის დროს. არანამკურნალებ შემთხვევებში, შესაძლოა, გამოვლინდეს რეპროდუქციული პრობლემები და ჰირსუტიზმი ქალებში; ასევე, შესაძლებელია გამოიწვიოს ისეთი სერიოზული გართულებები, როგორიცაა დიაბეტი, ჰიპერტენზია, ქსოვილების სიმყიფე და გუნება-განწყობის დარღვევები. არანამკურნალებ შემთხვევებში, პაციენტების 50%-ისთვის 5 წლიანი გამოსავალი არის ლეტალური.
ლევოკეტოკონაზოლი აინჰიბირებს კორტიზოლის სინთეზს. FDA-ის ავტორიზაცია დაფუძნებულია მეორე ფაზის იმ სამი კვლევის მონაცემების ეფექტურობასა და უსაფრთხოებაზე, რომელშიც სულ ჩართული იყო ენდოგენური კუშინგის სინდრომის მქონე 166 პაციენტი. ორივე შემთხვევაში, როგორც ღია ტიპის, ერთმხრიანი SONICS კვლევის, ასევე, რანდომიზებული, პლაცებო-კონტროლირებადი LOGIS კვლევის მონაცემებით, წამალმა მნიშვნელოვნად – ნორმის ფარგლებამდე შეამცირა საერთო თავისუფალი კორტიზოლის დონე შარდში და გააუმჯობესა სხვა მეორადი საბოლოო მაჩვენებლები. მიმდინარე ღია ტიპის OPTIC კვლევა სამომავლოდ შეაგროვებს და წარმოგვიდგენს გრძელვადიან მონაცემებს.
Recorvel-ის ეტიკეტი მოიცავს ყუთზე დატანილ გაფრთხილებას შესაძლო, სიცოცხლისთვის საშიშ ჰეპატოტოქსიკურობასა და Q-T ინტერვალის გახანგრძლივებაზე. მკურნალობის წინ და მკურნალობის განმავლობაში პაციენტებს უნდა ჩაუტარდეთ ღვიძლის ფუნქციების ანალიზი, ელექტროკარდიოგრაფია, ასევე, უნდა მოხდეს ჰიპოკალემიისა და სისხლში მაგნიუმის დაქვეითებული დონის კორექცია.
ყველაზე გავრცელებული არასასურველი რეაქციებია (ვლინდება >20%-ში) გულისრევა/ღებინება, ჰიპოკალემია, ჰემორაგია/კონტუზია, სისტემური ჰიპერტენზია, თავის ტკივილი, ღვიძლის დაზიანება, დაუზუსტებელი სისხლდენა საშვილოსნოდან, ერითემა, დაღლილობა, მუცლის ტკივილი/დისპეპსია, ართრიტი, ზედა რესპირატორული ინფექციები, მიალგია, არითმია, წელის ტკივილი, უძილობა/ძილის დარღვევები და პერიფერიული ედემა.
„კუშინგის სინდრომი არის ის იშვიათი მდგომარეობა, რომელიც შესაძლოა პაციენტებისთვის აღმოჩნდეს როგორც ფიზიკურად, ასევე, ემოციურად დამღუპველი. პაციენტების უმრავლესობა წლების განმავლობაში იტანჯება დაავადების სიმპტომებით; დიაგნოზის დასმის შემდგომ კი რჩებათ მხოლოდ შეზღუდული ეფექტურობის მკურნალობის შესაძლებლობა. მოხარულები ვართ, რომ იშვიათი წამლის შექმნის გრძელმა და რთულმა გზამ საბოლოოდ მიაღწია FDA-ის ავტორიზაციას და ამიერიდან წარმოადგენს ახალ თერაპიულ საშუალებას კუშინგის სინდრომით დაავადებული ადამიანების საზოგადოებისთვის,“ Xeris-ის განცხადებაში აღნიშნა ლესლი ედვინმა (Leslie Edwin), კუშინგის მხარდაჭერისა და კვლევის ფონდის პრეზიდენტმა.