საქართველოს ენდოკრინოლოგიისა და მეტაბოლიზმის ასოციაცია დაარსდა 2018 წლის 2 აგვისტოს. ასოციაციის დამფუძნებელია ექიმი ენდოკრინოლოგი, ნათია ვაშაყმაძე. ასოციაციის პირველ პარტნიორ წევრებს წარმოადგენენ ახალგაზრდა ენდოკრინოლოგები თბილისის სხვადასხვა სამედიცინო ცენტრებიდან.

საქართველოს ენდოკრინოლოგიისა და მეტაბოლიზმის ასოციაციის მთავარ მიზანს წარმოადგენს საქართველოში ენდოკრინოლოგიის დარგის წინსვლასა და განვითარებაში წვლილის შეტანა, პაციენტთა განათლება და ენდოკრინული დაავადებების შესახებ ცნობიერების ამაღლება, ასევე ენდოკრინოლოგთა და სხვადასხვა სპეციალობის ექიმთა შორის ინფორმაციის გაცვლისა და უერთიერთანამშრომლობის პლატფორმის შექმნა.

ამ მიზნების განხორციელების გზებად მოიაზრება:
• საერთაშორისოდ აღიარებული მაღალი ხარისხის მიუკერძოებელი სამედიცინო ლიტერატურის (გზამკვლევები, პროტოკოლები, სახელმძღვანელოები) თარგმნა და გამოცემა ქართულ ენაზე
• სტუდენტების, რეზიდენტებისა და ექიმებისათვის ლოკალური და საერთაშორისო ღონისძებების (კონფერენციების, სიმპოზიუმების, სამუშაო შეხვედრებისა და ტრეინინგების) ორგანიზება ქვეყნის შიგნით.
• ენდოკრინული დაავადებების შესახებ პაციენტებისათვის გასაგებ ენაზე სტატიების გამოქვეყნება ასოციაციის ვებ-გვერდსა და ფეისბუქ გვერდზე
• პაციენტთათვის სხვადასხვა ენდოკრინული დაავადების შესახებ საინფორმაციო სახის ბუკლეტების მომზადება და გავრცელება
• საინტერესო და იშვიათი კლინიკური შემთხვევების განხილვა და გამოქვეყნება ასოციაციის ვებ გვერდზე
• სხვადასხვა პროფესიულ ასოციაციებთან კომუნიკაცია და საერთო პროექტების განხორცილება

ასოციაციის პრეზენტაცია და ასევე პირველი საერთაშორისო ღონისძიება გაიმართა 2018 წლის 24 ნოემბერს, სასტუმრო ჰოლიდეი ინნ-ის საკონფერენციო დარბაზში თემაზე D ვიტამინი, კალციუმის ცვლა და ოსტეოპოროზი.